從前冬天一到，杏壇中學就怨聲載道。因為這是換冬季校服的日子。杏壇中學規定學生需穿著整齊學服上學，而整齊的意思在校規裡頭寫得清清楚楚，是包括校褸。即是規定帶校褸上學。最近校方又加插新規例，要求學生
於冬天週會穿上校褸。有人猜測是為了加強歸屬感。
試想香港的冬天越來越熱。二十餘度亦要穿校褸，與近千人同坐禮堂裡，實在難受。（根據可靠消息來源，當時有學生大量購入小林退熱貼，然後在週會前貼在背上胸口上。甚至有高年級生搞小林生意。）學生們當然不滿，但由於是校規，也沒有什麼正式渠道向訓導部反應，學生也只能照做。
但係係某年十月的學生會選舉期間，事情發生左微妙的變化。有班學生唔知係咪受左梁文道的啟發，竟然以極其特別形式參選。當年梁文道係某大的時候竟然以解散學生會，發還學生會會費這政綱黎參選。梁文道自述：「很筍的，贏梗啦。正經參選的那班人就很驚，想來找我們共商國是。」（動物兇猛－學生會剋星一段）那班參選學生的內閣叫「崇涼」意思是崇尚涼風的意思。（本來佢地叫尚風，不過怕同學誤解佢地黎係為查數所以放棄）。對面正經參選的就叫「喜閣」。
「崇涼」點特別法？唔直接答你，用例子答你。佢地的政綱與「喜閣」但多一條：要求全面廢除強制帶校褸。校方見係學生會選舉，不能打壓選舉，只係強調選舉只係選舉。雖然係咁，奇妙的事情依然發生。
杏壇中學學生會選舉終於來臨。當日台上答問環節，「崇涼」只係重覆「喜閣」的政綱與重點，不同的只係「崇涼」叫同學睇最後佢地最後一點政綱。其實「崇涼」唔需要多番提醒選民，因為他們要幹的這件事早就在高年班同學傳遍，連無票投的中一至中三都略知一二。（佢地投既係模擬選票，並不影響結果）
儘管係咁，「崇涼」當日點票都非常緊張，而對家「喜閣」好似仲緊張。唱票由下午三點三進行開始，兩閣都在場，唱了約三十分鐘，「崇涼」有明顯優勢，「喜閣」卻被佢地閣名嘲弄，丁點都唔喜。最後去到五點半，有效選票中「崇涼」得票過八成。而模擬選票中亦過七成五。「崇涼」就正式當選。好在呢班人辦事能力佳，「喜閣」的政綱佢地都做得無錯。
杏壇中學的冬季校服政策如何？校方見到「崇涼」的得票，在選報結果時重申校服政策屬訓導組管理，並非學生會，所以「崇涼」該屆並無任何大進展。不過，校方於翌年時為校褸加上溫度指標，若然最高溫度高過22度，同學無需帶校褸。最近聽些杏壇人講連22度要求都放寬，只係限於低過20度的週會日才需帶校褸。
當年我聽到有人話「崇涼」以下犯上，劫機學生會選舉，挑戰甚至砲打訓導部。我就非常唔同意。點係挑戰呢？「崇涼」幫助學生表達意見而已，根據訓導部講校服最終決定權都係係訓導部，而事實都係。「崇涼」要求全面廢除校褸政策；而訓導部最後都按照佢自己的原則及步伐辦事。唔通學生表達下意見都有錯？定話表達不同的意見就係以下犯上？我真係唔明點解「崇涼」有錯。我反而覺得好彩杏壇中學學生有投票，表達自己的意見，佢地先可以脫離練「耐熱功」的行列！
No comments:
Post a Comment